Amawulire

Kampeyini ze Kyadondo zikoma leero

Bya Damali Mukhaye

Akakiiko k’ebyokulonda kategezezza  nga bweketegekedde obulungi okuddamu okulonda kw’omubaka wa Kyadondo East.

Ekifo kino kyasigala kikalu oluvanyuma lwa kkooti ejulirwamu okukkanya  ne kkooti enkulu nebagoba Apollo Kantinti mu palamenti nti yazimuula amateeka g’ebyokulonda.

Abesimbyewo 6  kati mwezi mulamba nga banoonya akalulu era akulira eby’okulonda e Wakiso Francis Nkurunziza atutegezezza nti kampeyini zikomekerezebwa leero ku ssaawa 12 ezakawungeezi olwo batandike okutwala ebikozesebwa mu kulonda mu bifo webalondera.

Nkurunziza agamba okulonda kutandika ssaawa 2 ezokumakya kukomekerezebwe ku ssaawa 10 ez’olweggulo ku lwokuna.

Abaagala ekifo kino kuliko eyagobwa  Apollo Kantiti ow’ekibiina kya FDC ,munna  NRM  William Sitenda Ssebalu, omuyimbi  Robert Kyagulanyi amanyiddwa nga Bobi wine , Muwada Nkuyingi wamu ne  Edward Kasasa.