Amawulire

Police ekutte abadukanya esomero elyayidde – e’ Masaka

File Photo: Emotoka ya bazinya moto nga ezikiza omuliro

Poliisi ye Masaka ekutte omukulu wamu ne nanyini ssomero eryakutte omuliro nemufiiramu omuyizi.
Ababiri bano bakwatiddwa oluvanyuma lw’omuwala Asmat Najjuko okufiira mu nabbambulira w’omuliro.
Okunonyereza okwakakolebwa kulaga nga omuliro guno bwebavudde ku masanyalaze.
Okusinziira ku akulira poliisi enzinya mooto e Masaka Bernard Ssembusi ategezezza nga ensonga eno bw’elina okubeera ekiggula maaso eri abazadde okulondoola embeera y’amasomero gyebatwala abaana baabwe.
Ategezezza nga ekisulo abayizi mwebabadde basula bwekyabadde mu mbeera embi ekyaviriddeko amasanyalaze okukyokya.
Omwogezi wa poliisi mu bukiikia kkono bw’eggwanga Noah Sserunjogi akakasizza okukwatibwa kw’ababiri bano n’ategeeza nga bwebagenda okugulwako emisango gy’obulagajavu nga okunonyereza kuwedde.