Amawulire

Okuziika abantu mu kirindi- Okunonyereza kutandise

Poliisi e Kasese etandise okunonyereza ku balumbaganyi abaziikibwa ekirindi oluvanyuma lw’okuttibwa bwebaali balumbye abantu mu kitundu kya Rwenzori.

Gyebuvuddeko amaggye gaakakasa ng’abantu abasoba mu 60 bwebaazikibwa ekirindi oluvanyuma lw’ab’enganda zaabwe okulemerewa okuddukira emirambo gyabwe.

Omuduumizi wa poliisi mu bugwanjuba bw’eggwanga Thomas Kasimo agamba ssabapoliisi w’eggwanga Gen Kale Kayihura yalagidde dda poliisi okwanguya okunonyereza ku nsonga eno okumanya omuwendo omutuufu ogw’abo abaazikibwa ekirindi.

Abalumbaganyi abasoba mu 70 beebattibwa mu kavuvungano bwebaalumba abatuuze mu disitulikiti 3 okuli  Ntoroko, Bundubugyo ne  Kasese  nga abasinga battibwa bagezaako kulumba nkambi y’amaggye e Bundibugyo.

Mungeri yeemu

Bbo  abavunaanibwa okutta abantu mu bitundu by’e Rwenzori 51 nga bebasembayo bakulabikako maaso ga kkooti y’amagye olunaku olwenkya.

Wiiki ewedde 126 beebaggulwako emisango egitali gimu wali e Bundibugyo.

Omwogezi w’amaggye g’ekibinja eky’okubiri  Major Ronald Kakurungu, agamba kati boolekedde Kasese gyebagenda okuvunaanira bano.

Bonna abaggulwaako emisango baasindikibwa ku alimanda mu kkomera lya  Kyotogyo e  Fort Portal okutuusa nga  30 July  2014