Amawulire

Aba DP tebaasanyukidde kya Palamenti kugyamu bwesige Minisita Namuganza

Bya Prossy Kisakye,

Ekibiina kye byobufuzi ekya Democratic Party tekyawagidde ekya babaka mu lukiiko lweggwanga olukulu okugya obwesige mu minisita omubeezi owe byamayumba Persis Namuganza.

Olunaku lweggulo ababaka ba palamenti mu lukiiko olwakubirizibwa omumyuka wa sipiika Tomas Tayebwa abawera 248 bakubye akalulu akagyamu obwesige minister ono, ate abataano tebakiwagidde songa basatu tebalaze ludda.

Ono avunanibwa okuyisa olugaayu mu mateeka agafuga palamenti oluvanyuma lwa sipiika okulagira anonyerezebweko ku mivuyo gwettaka gyeyetobekamu mu bitundu bye Nakawa-Naguru.

Wabula mu kwogerako ne bannamawulire ku kitebe kya DP mu kampala, ssabawandiisi wekibiina, Gerlad Siranda, agambye nti ekyakolebwa kyabadde tekyetaagisa babadde balina okutuula ne bagonjoola ensonga eno mu bwasseruganda.