Amawulire

Gavumenti yetondedde Turinawe olw’okumunyiga ebbeere

Gavumenti yetondedde akulira abakyaala mu kibiina kya FDC  Ingrid Turinawe olwabaserikale ba poliisi abaamunyiga ebbeere.

Poliisi yanyiga Turinawe ebbeere n’okwonona emmotokaye bwebaali bamukwata mu April wa 2012 wali e Nansana.

Munnamateeka wa gavumenti  George Kalemeera ategezezza kkooti enkulu nga ekikolwa kino bwekyali ekibi era ekiswaza eri mukyaala Turinawe nga era n’asaba ensonga bazimalire wabweru wa kkooti.

Turinawe y’awaaba omusango guno nga ayagala aliyirirwe  obukadde  560 olw’okuswazibwa.

Turinawe nga ayita mu bannamateeka be aba  Rwakafuzi and company advocates yawawabira akulira ebikwekweto bya poliisi  Andrew Felix Kaweesi ne ssabawolereza wa gavumenti  Peter Nyombi nga ayagala baleete omuserikale omusajja eyamutigiinya ebbere.

Omulamuzi  Elizabeth Musoke akkirizza enjuyi zombi okusooka okutuula ebweru bateese nga era munnamateeka wa Turinawe  Ladislous Rwakafuzi wakusooka kumuwandiikira nga bwebakkiriziganyizza okuteeseza ebweru wa kkooti.