Amawulire

Kasiwukira afudde

Poliisi etandise muyiggo gw’emmotoka etomedde omusuubuzi Eria Sebunnya  amanyiddwa enyo nga  Kasiwukira amakya galeero n’emuttirawo.

Okunonyereza okukoleddwa okulaga nga Kasiwukira bw’atomeddwa mu bugenderevu bwabadde akola dduyiro, e Muyenga okulirana amaka ge.

Omwogezi wa poliisi mu Kampala n’emiriraano Patrick Onyango ategezezza ng’emmotoka eno bwesimbuddwa ku misinde egy’ekitalo amangu ddala nga Kasiwukira amaze okutomerwa.

Onyango ategezezza nga baliraanwa ba Kasiwukira bwebategezeza poliisi nti emmotoka eno ebadde esimbiddwa mu kitundu kino okumala akabanga era, esimbuddwa amangu ddala nga Kasiwukira etandise okukola Doyiro.

Ye Ssabapoliisi w’eggwanga Gen. Kale Kayihura nga naye atera okukolera dduyiro mu kitundu kino, atuuseko mu maka g’omugezi era n’asuubiza nti poliisi egenda kukola okunonyereza.