Abamu ku basirikare b’eggye ly’eggwanga elya UPDF mu ttunduttundu lya Central B bakukkulumidde abakulu abali ku mulimu gw’okuwandiika abagenda okuyingira mu maggye olw’okuwandukulula abaana baabwe kyokka nga bo balwanirira eggwanga lino.
Eggye lya UPDF mu kiseera kino liri ku ddimu ly’okuwandiika abaana abakyalina embavu, abalamu obulungi , wamu n’abamala siniya ey’okuna nga kibeerawo buli mwaka kyokka bannamaggye e Mubende balangidde abali ku mulimu guno okugaana okuyingiza abaana baabwe n’ebabasuula ebali.
Akuliddemu omulimu guno mu ttunduttundu lya Central B Col. Jeff Mukasa agambye nti basanze okusomoozebwa ng’abali mu mulimu gw’okuwandiika kubanga n’abamu ku baana b’abajaasi bano tebalina biwandiiko.
Omwogezi w’amaggye ga UPDF ag’omu bbanga Maj Kiconco Tabaaro agambye nti omuwendo gw’abaana abatalina mirimu mu ggwanga mungi
Kiconco awakanyizza olugambo olubadde luwulirwa mu bannamaggye e Mubende nti abakulu bawandiise abaana baabwe n’ababakulu okuva mu disitulikiti endala nebasuula ab’awaka.
