Bya Ruth Anderah
Omubaka wa Kyadondo East Robert Kyagulanyi Ssentamu amanyidwa nga Bobi Wine yasuze Luzira nga gyagenda okubeera okutukira ddala ku Lwokuna lwa wiiki eno.
Kino kiddiridde kkooti ya Buganda Road okumusomera omusango gw’obutagondera biragiro bya poliisi bweyakuba olukungaana olumenya amateeka, nga July 11, 2018 ku City Square nga tasoose kugitegeezaako.
Mu lukungaana luno Bobi yali yeekalakaasa ng’awakanya ekya omusolo gwa mobile money ogwakazibako erya OTT.
Mu musango gwe gumu kigambibwa nti yalemererwa okukolagana ne poliisi okukakasa nti abantu abaali mu lukung’aana lwe tebalina bissi.
Omusango ogumusomeddwa mu maaso g’omulamuzi Esther Nahirya owa kkooti ya Buganda Road wabula agwegaanye.
Kkooti esoose kuyimirizibwamu okumala eddakiika 15 looya we Asuman Basalirwa bw’amutegeezezza nti abantu ababadde balina okumweyimirira babadde basibiddwa wabweru wa kkooti.
Ono avunaanibwa n’abalala okuli Lule David, Katongole Julius, Nyanzi Fred Ssentamu, ne Ssebuufu Edward amanyiddwa nga Eddie Mutwe.
Mu kusooka Poliisi yakutte omubaka Kyagulanyi e Mulago, bwabadde ayolekera ku kitebbe kyaba mbega e Kibuli.
Eno poliisi yakubye n’omukka ogubalagala mu bawagizi be ababadde beyongedde okumugoberera, n’okulekanira waggulu nti People Power.
Omubaka Kyagulanyi yayitibwa okukola statemimenti ku misango gy’okukuma omuliro mu bantu nokukuba olukungaana olumenya amateeka.
Mungeri yeemu omubaka wa munispaali ye Mityana Zaake Francis Butebi asibiddwa ku Poliisi y’e Naggalama, ongono yabadde ne Mubaka munne Robert Kyagulanyi Ssentamu.
