Bya Ruth Anderah ne Ndaye Moses
Omusango gw’omubaka wa Kyadondo East Robert Kyagulanyi Ssentamu amanyiddwa nga Bobi Wine, gutandise nga guwulirwa ku lutambi.
Ono talabiseeko mu kooti buterevu mu maaso gomulamuzi wa kooti ya Buganda Road nga bwekibadde kisubirwa.
Ssabalamuzi we gwanga Bart Katureebe gyebuvuddeko yatongoza enkola eno, nga egenda kukozesebwa okuyita mu technologiya.
Ono abadde asubirwa mu maaso gomulamuzi we ddala erisooka Esther Nahirya, nga wetwogerera kooti ekubyeko abantu bangi ababadde bamulindiridde.
Bbyo ebyokwerinda binywezeddwa okwetoola kooti ya Buganda Road.
Omusasai waffe Ndaye Moses eno gyali atubulidde nti noluguudo lwonna lugaddwa, eri ebidduka okujjako abebigere.
Bobi Wine kinajjukirwa nti yakwatibwa nga April 26th 2019 nasimbibwa mu maaso gomulamuzi wa kooti ya Buganda Road owe ddala erisooka Esther Nahilya, navunanibwa okujemera ebiragiro bya poliisi ebiri mu mateeka, nga noluvanyuma yasindikibwa ku alimanda e Luzira.
Kino kyadirira munnamateeka we Asuman Basalirwa okutegeeza kooti nti abantu abaali bazze okweyimirira omuntu we, baali baganiddwa okuyingira kooti.
Okusinziira ku mpaaba Bobi Wine emisango yagidiza ku City Square nga July 11th 2018, bweyakulemberamu okwekalakasa ku musolo gwa mobile money, nga tategezezza ku poliis.
Avunanibwa wamu ne muganda we Fred Nyanzi Sentamu nabantu abalala 3, era emisango gyejimu.