Bya Shamim Nateebwa
Obwakabaka bwa Buganda bukungubagidde Omumbejja Annette Nakalema olw’emirimu gyakoledde Obuganda.
Mu kusabira omwoyo gw’omugenzi mu Lutikko e Lubaga olwaleero, Obubaka bwatisse Amb. William Matovu, Ssaabasajja Kabaka Ronald Muwenda Mutebi II atenderezza emirimu gyomumbejja Nakalema nagamba nti akoze kinene nnyo okubunyisa n’okumanyisa enteekateeka z’obwakabaka mu bantu ba Kabaka abali mu America, era obuwereza bwe bunajjukirwang.
Bwo obubaka bwa Katikkiro Charles Peter Mayiga obusomeddwa Minisita wa Kabaka ow’okunonyereza, Owek Sylivia Mazzi. Kamalabyonna agambye nti obuweereza bwa Nakalema bunajjukirwanga naddala bweyali ngakyakolera ku kitebe kya America, mu nkungaana za Buganda Bumu, n’emirimu gyeyakola ng’omutandisi w’ekibiina kya Essuubi Lya Buganda Katikkiro kyeyayogerako mu kitabo kye King On the Throne.
Ye Minisita w’amawulire nabagenyi, era omwogezi w’obwakabaka, Owek. Noah Kiyimba yeebazizza Omumbejja Nakalema olw’okufuba ennyo okulabirira n’okujjanjaba Maama we era amulese alabika bulungi.
Agambye nti abantu bangi bafuna okusoomoozebwa okw’okulabirira bakadde baabwe, era bangi tebabafaako.
Mungeri yeemu Owek Kiyimba asomye obubaka obuvudde mu bantu ab’enjawulo omuli n’obuvudde mu Bukama bwe Bunyoro, obuvudde ew’omubaka wa Kabaka e Boston omulongo Kato Kajubi.
Omubejja Nakalema yafiira mu gwanga lya Sweden ku ntandikwa yomwezi guno.
