Ab’enganda z’abantu abagambibwa okuttibwa mu kavuyo akaabadde e Wandegeya bagumbye ku ggwanika e Mulago nga bagaala mirambo gyaabwe.
Bano bagamba nti abantu baabwe battiddwa olunaku lwajjo emirambo gyaabwe negitwalibwa mu ggwanika.
Twogeddeko n’omu ku bano atatuukirizza mannya ge ng’agamba nti muganda we Daniel Nsubuga bamukubye essasi mu bulago bweyabadde addukira mu lukuubo lw’akeedi emanyiddwa nga Silver wali e Wandegeya .
Ono agamba nti muganda we bwebadde nga bava e Kawempe bamututte e Mulago kyokka nga babadde tebasobola kubawa mirambo ku makya.
Poliisi eyiiriddwa ku ggwanika nga bannamawulire bagaaniddwa okuyingira okukakasa abantu bameka abaafudde.
Omusasi waffe Shamim Nateebwa atutegeezezza abalala abakima emirambo bakkirizibwa kyokka nga bakeberebwa nnyo ate abalala bagaaniddwa
Wabula ayogerera poliisi mu Kampala n’emiriraano Patrick Onyango agamba nti omuntu omu yeeyafiiridde mu kavuyo akabaddewo.
