Mu kawefube w’okulwanyisa obuzzi bw’emisango mu disitulikiti ye Kalungu, ab’obuyinza mu disitulikiti eno baweze ebyuuma bya zaala byonna.
Omubaka wa pulezidenti mu disitulikiti eno Abu-Bakr Lubega Kaddunabi ategezezza nga abamenyi b’amateeka bangi bwebamala ebiseera byabwe ku byuma bino nebagaana okukola bwebuziba nebatabaana ebyalo nebatulugunya abatuuze.
Agamba kizibu okuzuula bananyini byuma bino kubanga bangi babitekawo awatali kufuna layisinsi olwo nebabba ssente z’abatuuze.
Ye ssentebe wa tawuni ye Lukaya Gerald Magella Kikyamu agamba ebyuma bino kati bisasanidde mu butawuni obwenjawulo nga bitwaliddemu n’abaana abato.
Bbo abatuuze basanyukidde kino nebategeeza nti osanga kino kinabataasa ku buzzi bw’emisango.
