Bya Sadat Mbogo
Abantu mu Zone y’e Wakimese mu town council y’e Kyengera mu district y’e Wakiso baguddemu ekyekango, bwebafunye amawulire g’okuttibwa kwa munnaabwe.
Omugenzi kigambibwa nti eyamusse yasoose kumukabasanya, oluvannyuma n’amuyiira amazzi agooca n’amufumitafumita ebiti mu bitundu bye byekyama.
Omugenzi ye Norine Nalubega ngabadde atemera mu myaka 18, era abadde mufumbi wa caayi n’obuugi mu kitundu, nga yava Luwero.
Mulirwana we yalabye enswera nga ziva mu nnyumba, bweyekengedde nategeeza ku ssentebe we kyalo Christopher Ganaggwa, era bwebamenye olugi basanze mulambo.
Oluvannyuma omulambo gutwaliddwa mu ggwanika ly’eddwaliro ekkulu e Mulago okwongera okugwekebejja.
Akulira ebyokwerinda e Kyengera Robert Walugembe atubuulidde nti omukazi ono abadde alina omulenzi gweyaganza ngabadde atera okumukyalira, era awo webagenda okutandikira okunonyereza.
