Abakozi ba supamaketi ya Uchumi e Gulu abasoba mu 90 bakonkomaliridde ku mulyango oluvanyuma lw’okusanga nga webakolera bagaddewo nga n’ebyokwerinda binywezeddwa.
Omu ku bakozi Isaac Okello ategezezza nga nabo bwekibabuuseko okusanga omuggalo nga mpawo kyabategezeddwa.
Bino okubaawo nga aba kampuni enunzi y’enkoko eya Ugachick kyejje eragile bawanyondo ba kkooti nebalumba ettabi ekkulu erya Uchumi ku Garden City olunaku lw’eggulo nebawamba ebintu lwabbanja kale nga abakulu ba supamaketi eno babaddemu okutya nti bano bandibalumba ne Gulu nebakola kyekimu.
Okello era anyonyodde nga bwebategeka enkiiko okusisinkanamu abatwala supamaketi eno nga babanja omusaala wabula nebabalimba nga eyalina okuteeka omukono ku cheeke y’okubasasula bw’atabadde mu ggwanga.
Ye akulira ekibiina ekigatta abakozi ba supamaketi eno Jimmy Okwera ategezezza nga abakulira supamaketi eno bwebabadde banyunyunta abakozi nga babasala ensimbi okutereka mu kitavu ky’abakozi wabula nga tezitukayo.
Mungeri yeemu bbo aba kampuni enunzi eya Ugachick bategezezza nga bwebalumbye supamaketi ya Uchumi ku Gaeden City lwa bbanja.
Akulira kampuni eno Aga Ssekalala Siniya ategezezza nga bano bwbebadde bababanja obukadde 180 mu bintu byabwe byebabadde babawa okutunda wabula nga mpaawo kavaayo.
Ssekalaala agambye batuuka ku nzikiriziganya n’aba supamaketi eno okusasula mu nnaku 45 zonna wabula nebibalema kwekusalawo okutwala bawanyondo ba kkooti okuwamba ebintu ebimu okwesasula.
